Oʻzbekiston Respublikasi Open Data Inventory (ODIN) ochiq ma’lumotlar reytingida 66 ballni toʻplagan holda mazkur reytingda dunyoda 40-oʻringa ko‘tarildi hamda Markaziy Osiyoda 1-oʻrinni saqlab qoldi. https://odin.opendatawatch.com/Report/countryProfileUpdated/UZB?year=2022
Xususan, Open Data Inventory (ODIN) - rasmiy statistika kamchiliklarini aniqlash, ochiq ma’lumotlar siyosatini ilgari surish, milliy statistika organlari bilan ma’lumotlardan foydalanuvchilar oʻrtasida muloqotni yaxshilash va ragʻbatlantirishga qaratilgan qamrov va ochiqlikni baholaydi.
Open Data Watch – ochiq ma’lumotlar va rasmiy statistika oʻrtasida faoliyat olib boruvchi xalqaro notijorat tashkilot. Ularning faoliyati rasmiy statistik ma’lumotlarni ishlab chiqish va boshqarishda oʻzgarishlarni amalga tatbiq qilishdan iborat. Open Data Watch tashkiloti butun dunyo boʻyicha mamlakatlar rasmiy statistikasining qamrovi va ochiqligini yillik baholashni oʻtkazish maqsadida Ochiq ma’lumotlar reestri (ODIN)ni yaratdi. Ma’lumotlarning sifati va ochiqligi monitoringini amalga oshirish orqali ular hukumatlarga, xalqaro tashkilotlarga va fuqarolarga Barqaror rivojlanish maqsadlari (BRM)ni baholash va erishish muammolarini hal etishga yordam berishlari mumkin.
Oʻzbekiston Respublikasi Prezidenti huzuridagi Statistika agentligi Open Data Watch tashkiloti bilan 2019- yildan boshlab YEXHTning Oʻzbekistondagi loyihalari Koordinatori koʻmagida hamkorlik qilib kelmoqda.
Oʻzbekiston Open Data Inventory (ODIN) reytingida:
- 2015- yilda baholangan jami 125 ta mamlakat ichida 3 ball to‘plagan holda oxirgi 125-o‘rinni;
- 2016- yilda baholangan jami 173 ta mamlakat ichida 13 ball to‘plagan holda 168-o‘rinni;
- 2017- yilda baholangan jami 180 ta mamlakat ichida 18 ball to‘plagan holda 167-o‘rinni;
- 2018- yilda baholangan jami 178 ta mamlakat ichida 19 ball to‘plagan holda 168-o‘rinni;
- 2020- yilda baholangan jami 187 ta mamlakat ichida 63 ball to‘plagan holda 44-o‘rinni egallagan.
2022- yilda esa baholangan jami 192 ta mamlakat ichida 66 ball to‘plagan holda dunyoda 40-o‘ringa ko‘tarildi.