Vatan – bu inson va uning avlod-ajdodlari kindik qoni to‘kilgan muqaddas dargohdir. Vatan – bu ajdodlar maskani, el-yurt, xalq voyaga yetgan, uning tili, tarixi, madaniyati, urf-odatlari, qadriyatlari chinakamiga shakllanib, o‘sib, kamol topib boradigan zamindir. Mana shu Vatanini asrab-ardoqlash, himoya qilish har birimizning farzandlik burchidir.
Axir donolarimiz bekorga aytishmaganku: Tug‘ilgan yerdan ko‘ngil uzilmas, Yurt qo‘riganning yurti buzilmas. Yurtda vatanni sevadigan, ardoqlaydigan va himoya qiladigan mardlar bor ekan shu yurt doimo yuksalaveradi, gullayveradi. Har bir el, har bir millat uchun o‘zining tug‘ilib o‘sgan vatanidan ardoqliroq maskan bo‘lmasa kerak.
Vatanparvarlik mavzusida juda ko‘p olim-u ulamolarimizning ijod namunalari, bu haqdagi fikrlari bizgacha yetib kelgan. Amir Temur, Alisher Navoiy, Muhammad Zaxiriddin Bobur, Mirzo Ulug‘bek va boshqa ajdodlarimizning ijod namunalari hozirgi kungacha, ya’ni bizning zamonamizda ham oʻziga xos o‘rin egallagan boʻlib, yoshlar tarbiyasida ibrat, namuna sifatida qoʻllanib kelinmoqda. Vatan tushunchasini har kim har xil ma’noda, o‘zining tushunish darajasida talqin qiladi. Bu insonning tug‘ilgan, kindik qoni to‘kilgan joydir, bolalik, yoshlik davri o‘tadigan, ta‘lim-tarbiya topadigan, safar qilsa, mudom qo‘msaydigan joydir . Vatanni sevish, uning ravnaqi yo‘lida xizmat qilish, uni yomon ko‘zdan, qora kuchlardan himoya qilish, uning sha’nini himoya qilish bularning barchasi siz-u bizning oldimizda turgan mas’uliyatli vazifalardandir.